Arantxa Lopez Luloagak, Amasa-Villabonako Gizarte Zerbitzuetako zinegotziak, jakitera eman du Santiago egoitzako egoiliarrek ikasturtean zehar ehundu egiten dutela egoitzan bertan, eta gaurko ekimenarekin "etxean ezkutuan egiten zena, kalera atera eta balioan jarri nahi" izan dutela.
Orain artean, gehiegitan, etxeetan ezkutuan geratzen zena indarkeria matxista ere bazen. Horrela izanik, gaurko ekintza sinbolikoarekin indarkeria matxista horri aurre egiteko baliatu dute #puntuetakitto adieraziz. Beste hainbat helburu ere bete nahi ziren 2021ean Pasaian hasitako mugimendu honekin: ehuntzearen artea aldarrikapen feministarako tresna bihurtzea, eremu publikora ateratzea emakumeei eta eremu pribatuari lotuta egoteagatik beren balioa kendu zaien diziplinak, auzoa eraikitzeko eta ehuntzeko hurbiltasuneko harreman afektiboei balioa ematea eta lanen atzean dagoen jakinduria ikusaraztea, hain zuzen ere.
Ekimenak, Gipuzkoako Foru Aldundiaren babesa izan du eta, Villabonako Santiago egoitzan egin bezala, beste sei puntuetan ere matazak kalera atera dituzte: Astigarraga, Pasaia, Errenteria, Hondarribia, Gasteiz eta Eibar.