Iraupen fasea «luzea» egin zaiela aitortu du Iñaki Artola Billabona taldeko kapitainak: «Denboraldia nahiko gorabeheratsua izan da guretzako, eta baita klubarentzako, baina azkenean helburua lortu dugu». Iraupen fasea jokatu behar izan zuten lehenbizi, eta hor bere multzoko azken bigarren geratu ondoren, lauko finala jokatu behar izan dute. Lau talde horietatik finala irabazten zuenak eusten zion mailari eta beste hirurak jaitsi egiten ziren.
Idiazabalen aurkako partida «epikoa» izan zela esan du Artolak: «Pentsatzen genuen penaltietara iritsiko ginela eta ez genuen hori nahi. Azken minutuan sartu genuen gola, Kimetzek area kanpotik egindako jaurtiketa batekin. Oso polita izan zen une hori, eta harmaila ia behera erori zen».
Finala nahiko berdindua izan zen, eta bi taldeak ondo aritu ziren defentsan, billabonatarrek gol aukera gehiago izan arren. «Baina golik ez genuen sartzen eta azkenean azken unera arte itxaron behar izan genuen», azaldu du Artolak.