Euskal Mendizale Federazioak antolatzen duen 30. Haur Ibilaldia egingo dute maiatzaren 29an Amasa-Villabonan, Aizkardi mendi elkarteak antolatuta. 09:00etan egingo zaie harrera parte hartzaileei Errebote plazan trikitixa doinuekin eta haur bakoitzari kontrol txartel bat emango zaio. 14 urte arteko umeek parte har dezakete euren guraso edo tutoreak lagunduta, eta aurrez, www.emf.eus helbidean eman beharko dute izena. Egunean bertan, 08:30ean mahaiak jarriko ditu antolakuntzak izena eman nahi dutenentzat. Doakoa izango da parte hartzea.
Haur ibilaldia zirkularra izango da eta Errebote plazatik 09:30ean abiatuko dira haurrak Aizkardi mendi elkarteak prestatu dituen hiru ibilbideak egiteko. Plastikozko zintekin markatuta egongo dira bideak eta parte hartzaile bakoitzak bere baldintzetara ondoen egokitzen dena egin ahal izango da. Ibilbide luzeak 13,5 kilometro ditu, motzak 9,5 kilometro eta motzenak 7,5 kilometro. Ibilbidean zehar hainbat informazio puntu egongo dira. Antolatzaileek jakinarazi dutenez ibilbide luzeko bidea itxiko duen kontrol bat jarriko dute Mendabietan 11:00etan eta ibilbide motzako bidea ixteko 13:00etan beste kontrol bat jarriko dute Komizar parkean. Parte hartzaile guztiak Errebote plazan 14:00etan bilduko dira. Plazan bertan 12:30etik aurrera trikiti doinuak egongo dira eta parte hartzaile bakoitzarentzat pintxo bana banatuko da. 14:30ean emango diote amaiera 30. Haur Mendi Ibilaldiari Amasa-Villabonan.
Aizkardi mendi elkarteak garraiobide publikoa erabiltzea gomendatu du eta gogorarazi du Errebote plazak ez duela autoentzat sarbiderik. Aldi berean, parte hartzaileei ibilbidean zehar jarriko den seinaleztapena errespetatzeko eskatu die eta bakoitzak sortzen dituen hondakinak bere motxilan eramateko. Informazio gehiago nahi duenak Euskal Mendizale Federazioaren webgunean izango du edo bestela antolatzaileekin jarri daiteke harremanetan ibilaldia@aizkardi.com helbidean, 19:00etatik 21:00etara, 649 71 71 82 telefonoan.
