Korrikalariak 10:30etan Amasatik abiatu dira, eta 9,73 kilometro egin behar izan dituzte guztira; 631 metrora dagoen Loatzo mendia igo ostean, Amasan bertan zegoen helmugara itzuliz. Guztira, 69 korrikalariek parte hartu dute, baina Jokin Tolosa anoetarra eta Leire Elola tolosarra izan dira lehenak helmuga zeharkatzen.
Tolosak 46 minutu eta 12 segundo behar izan ditu Loatzo igo eta jaisteko. Herrira Axier Aburuza adunarraren atzetik sartu bada ere, azken metroetan aurre hartzea lortu du helmuga lehena zehartuz: “Igoera guztian zehar bost korrikalari elkarrekin joan gara, eta jaitsieran ere halaxe izan da. Inorrek ez zuen aurrera edo atzera egiten. Herrira sartzean hiru korrikalari bakarrik ginen, ni bigarren. Azken metroetan lehenak erritmoa mantentzen zuela ikusi, eta orduan estutu egin dut”. Hirugarren postuan sailkatu da Josu Urrestarazu idiazabaldarra, 46 minutu eta 25 segundoko denborarekin.
Elolak jantzi du emakumezkoen sailkapenean txapela, eta berak 55 minutu behar izan ditu lasterketa amaitzeko. Honek ere atzetik Oihana Zubillaga anoetarra izan du, eta lau segundo beranduago zeharkatu du helmuga bigarren postuan sailkatuz. Lasterketa munduan hasi berria bada ere, denbora hobetzeko azken metroetan Zubillagarekin batera izan duen lehia eskertu duela kontatu du Elolak: “Garaipen honi esker, jarraitzeko eta hobetzeko gogoarekin nago”. Minutu gutxira bukatu du lasterketa Aitziber Ibarbiak, 58 minutu eta 45 segundoko denborarekin hirugarren postuan sailkatuz.
Eneko Gurrutxaga izan da helmuga zeharkatu duen lehen herritarra, 58 minutu eta 45 segundoko denbora eginez.
Amasako gazteek eta Uxo Toki elkarteak antolatu dute lasterketa, eta amaieran, guztiek hamaiketakoa egin dute Uxo Toki elkartean.
Sailkapenak
Gizonezkoak
- Jokin Tolosa Zabala 00:46:12
- Axier Aburuza Belamendia 00:46:14
- Josu Urrestarazu Garaia 00:46:25
Emakumezkoak
- Leire Elola Izagirre 00:55:00
- Oihana Zubillaga Blanco 00:55:04
- Aitziber Ibarbia Beloki 00:58:45
Herritarra
- Eneko Gurrutxaga Ugarte 00:50:22
