"Ikasturtea hasi zenetik orain arte ikasi dutena herriari erakusteko eguna da, egun berezia", esan du Lierni Kamio Oinkari dantza taldeko dantzariak gaurko egunaz galdetuta. Bera izan da gaurko egunaren antolatzaileetako bat, eta azaldu duenez, 250 ikasle inguru ibili dira plazaz plaza, goizean, dantza desberdinak eskaintzen, herriko hiru plazetan. "Arroako plazan argazki bat atera dugu lehenik, Oinkariko talde guztiek". Izan ere, Dantzari Egunean, Oinkarik herri ezberdinetan dituen dantzariak elkartzen dira.
Ondoren, 13:00ak aldera, Errebote plazan eskaini dute emanaldia ikasle guztiek. Eguraldiaren aitzakiarik ez dute izan, eta pozik pasa dute goiza. Gero, ezin izan dute betiko moduan elkarrekin bazkaria egin, Kaniok azaldu duenez, pandemiagatik ez egitea erabaki zutelako. Plazako emanaldi aurretik, ordea, hamaiketakoa egin dute. Aurrerantzean, ikasturtean zehar ikasten dutena ekainean egin ohi duten emanaldian eskainiko dutela aurreratu du.
