Ezin hobeto hasi du Uztaien Ligako denboraldia Ander Lizarralde izkingile billabonatarrak; izan ere, joan den asteburuan Fiteroko Uztai Txapelketa irabazi zuen Azpeitiko Xabi Iturralderekin batera, eta 252 punturekin sailkapenean lehen postuan kokatuta ekin diote 2022ko denboraldiari.
Martxoaren 13an jokatu zuten Fiteroko Uztai Txapelketa, herri nafarraren zezen plazan, eta, guztira bederatzi bikote aritu ziren lehian. Lehen fasean, Eulogio Mateo ganadutegiko Ponchera behiari zazpi uztai sartzea lortu zuten Lizarraldek eta Iturraldek, eta hirugarren sailkatu ziren, horrela finalean sartuz. Lehen itzulian emaitzarik onenak eskuratu zituzten hiru bikotek jokatu zuten finala, eta Lizarralde eta Iturralde nagusi izan ziren Eulogio Mateo ganadutegiko Ladrona behiari sei uztai sartuta. Bihar bertan izango dute bi izkingileek ligako hurrengo hitzordua, Alagonen (Zaragoza, Espainia).