Amasako frontoian eman diote hasiera, gaur goizean, Gipuzkoako Pilota Egokituko Txapelketari. Bi modalitatetan jokatuko dute txapelketa; batean, adimen urritasuna duten pilotariek jokatuko dute, eta bertan hamazazpi partaide daude, eta bestean aulki gurpildunetan aritzen direnak, eta hor zortzi partaide dira. Modalitate bakoitzean bi lehiaketa izango dira, bakarka zein binaka.
Goiz osoan zehar 11 partida jokatu dituzte. Horietan, adimen urritasuna duten hamabi pilotarik hartu dute parte, pala modalitatean, buruz burukoari hasiera emanez. Behin buruz buruko partidak amaituta, hor lortutako emaitzen arabera osatzen dira bikoteak binakako txapelketarako. Eskualdeko pilotaririk ez dago adimen urritasuneko modalitatean; gurpildun aulkietan Hilario Olano alegiarrak eta Aingeru Senperena goiaztarrak parte hartuko dute.
Gaurko jardunaldiaren ondoren, beste zazpi jardunaldi jokatuko dira Gipuzkoan zehar, eta eskualdean horietako bat jokatu da, Asteasun, otsailaren 26an. Buruz buruko finalak Idiazabalen jokatuko dira, martxoaren 12an; binakako finalak, berriz, Zumaian, maiatzaren 14an.