Villabonako Behar Zana frontoia goraino bete da goizean IX. Antton Pebet Txapelketako finala ikusteko. Bertan aritu dira Tolosa-Aurrera elkarteko Julen Aizpuru asteasuarra eta Soraluzeko Ander Murua pilotariak, Oberena elkarteko Josu Igoa eta Irurtzun elkarteko Aaron Arbizuren aurka. Tentsio handiko finala jokatu dute lau pilotariek, baina, azkenean, Murua eta Aizpuruak osatutako bikoteak 22-18 emaitzarekin jantzi du txapela.
Muruak eraman du pilotari onenaren saria, partida guztian zehar maila oso onean aritu baita. Igoa izan du arerio eta bera ere zuzen aritu da gaurkoan ausart jokatuz. Tentsioaren eraginez, ordea, hutsegite asko egin ditu.
Finalaren aurretik, Villabonako pilotalekura bertaratu diren jarraitzaile guztiek aspaldiko jokamoldea ikusteko aukera izan dute; joko garbi elite mailako partida, hain zuzen. Karrikaburu eta Sistiaguek osatutako bikoteak 40-33 emaitzarekin irabazi dute partida, Larronde eta De Paredesen aurka.