Villabonako Kale Nagusiko Labezain okindegiaren azken eguna izan da gaurkoa. Karlos Agirrebengoa Kali okinak erretiroa hartu du eta eguerdian, omenaldi xumea egin diote Oria merkatari elkarteko kideek Agirrebengoari, eta haren amari, Miren Ibargureni. Agurra dantzatu eta lore sorta bana eman diete eta Beatriz Unzue alkateak oroigarri bat eman die, herriaren esker ona adieraziz.
Horrenbestez, Villabonan geratzen zen azkeneko ogi-lantegia desagertu da. Amasa-Villabonako Udalak esker hitzak izan ditu Labezaingo langileentzako: "Eskerrik asko Kali, Miren eta Labezaingo langile guztiei. Urte luzez egindako lanagatik eta herriari egindako ekarpen handiagatik".