Irrintzi Txirrindularitza Elkarteak antolatuta, gaur arratsaldean jokatu da Amasa-Villabonako Sandra Baserrira I. Kronoigoera Bizikletaz lasterketa. Proba gogorra zen partaide guztientzat, eta denera, 19 txirrindularik hartu dute parte, 17k gizonezkoetan, eta 2k emakumezkoetan.
Gizonezkoetan, Luis Mari Urizar etxeko ziklista izan da azkarrena. Billabonatarrak 14 minutu eta 19 segundo behar izan ditu. Xabat Ibarbia zizurkildarra izan da bigarren, 14 minutu eta 59 segundoko markarekin. Hirugarren, berriz, Alex Gaztañeta asteasuarra izan da, 15 minutu eta 24 segundo behar izan dituelarik. Oso estu izan da hirugarren posturako lehia. Izan ere, Unai Artola amasarrak eta Oier Etxeberria azpeitiarrak hiru eta lau segundo gehiago behar izan dituzte, hurrenez hurren.
Emakumezkoei dagokienez, Lorea Burgete lekunberritarrak lortu du garaipena. Txirrindulari nafarrak 18 minutu eta 31 segundo behar izan ditu Sandra baserri parera iristeko. Aitziber Murua billabonatarra sailkatu da bere atzetik, 22 minutu eta 39 segundoko denborarekin.
Gazteei dagokionez, 18 urtez azpikoetan, Ibai Gabarain tolosarra izan da onena. 16 minutu eta 27 segundo behar izan ditu, bataz beste %9,6ko malda zuen ia lau kilometroko igoera osatzeko.