Amasa-Villabonako Gurea antzokian izango da kontzertua, larunbatean 18:00etatik aurrera. Bertan, Fabiana Boer (ahotsa eta bonbo legüero) eta Leandro Yaku (gitarra) musikariek Argentinako folklore garaikide eta tradizionalean zehar ibilbidea eskainiko dute. Boer eta Yakuren emanaldiaren aurretik, Marijo eta Alex billabonatarrek hainbat abesti eskainiko dituzte.
Canciones de aquel otro lado del charco izenburua eramango du larunbateko kontzertuak. Musika emanaldi honekin, Amasa-Villabonara lanera etortzeko itsasoa zeharkatu behar izan duten guztiak omendu nahi ditu udalak. "Gure herriak aurrera egin dezan, ahalegin eta dedikazio handiz lan egin duten herritar hauek merezi duten omenaldia eskaintzera animatzen ditugu amasar eta billabonatarrak", esan dute udal ordezkariek.