Amaia Agirrek irabazi du I. Señora sariketa

Argazkia: Ane Zuazubiskar

Larunbatean Lesakako Arrano tabernako terrazan ospatu zen finala eta billabonatarrak jantzi zuen 'pamela', Onintza Enbeitarekin buruz-burukoa jokatu ondoren.

Emakume bertsolarien ahalduntzean sakondu, harremanak sendotu eta elkarrekin kantatzeko gunea izan da aurten lehen aldiz antolatu duten Señora sariketa.

Bi kanporaketa ospatu dira, apirilaren 17an Aramaion eta apirilaren 24an Mutrikun. Bi saio horietatik Haizea Arana Cardenal, Miren Artetxe Sarasola, Paula Amilburu Izargarai eta Saioa Alkaiza Guallar sailkatu ziren aurreko larunbatean Lesakan ospatutako finalera. Antolatzaileek "ohorezko señora" izateagatik Onintza Enbeita Maguregi eta Amaia Agirre Arrastoa bertsolariak gehitu ditu aurten txapelketara, finaleko seikotea osatzeko.

Maila handiko saioa izan zen hasieratik eta bertaratutako entzuleek bertsoaz eta giroaz gozatzeko parada ezin hobea izan zuten. Hain zuzen, ohorezko bi señorek, Enbeitak eta Agirrek lortu zuten larunbatean buruz-burukora salto egitea. Billabonatarrak lortu zuen garaipena azkenean, 'pamela' eskualdera ekarriz.

Lesakako Estitxu Arozenak jantzi zion 'pamela' txapeldunari eta sari emate ekitaldian izan ziren, besteak beste, Rosi Lazkano, Maialen Lujanbio eta Kristina Mardaras.

Albiste hau ATARIKIDEei esker argitaratu dezakegu. Haiei esker Tolosaldeko albisteak libre, euskaraz eta kalitatez irakurtzen dituzu. Horrela izaten jarraitzeko eman babesa Tolosaldeko Atariari eta ZU ERE IZAN ZAITEZ ATARIKIDE.

#EgitenDuzunaGara


EGIN ATARIKIDE!