Geuretik Sortuak proiektua jarri du martxan Udalbiltzak, Euskal Herriko udaletxe eta hautetsiak batzen dituen erakundeak. Euskaraz sortutako literatura, zinemagintza eta antzerkia sustatzea da proiektuaren helburua, eta, horretarako, sormen lanak egiteko egonaldiak antolatu ditu sortzaileentzat Euskal Herri osoko hainbat herritan.
Denera, 26 udalerri eta beste hainbeste sortzaile hautatu dituzte: hamasei idazle, bost zinemagile eta bost antzerki konpainia. Euskal kulturgintzako izen ezagunak dira horietako batzuk; izen berriak edota horren ezagunak ez direnak, beste batzuk. Amasa-Villabonako Udalak ere parte hartu du ekimenean eta Udalbiltzak jakinarazi duenez, Maitane Perez idazle eta aktore iruindarrak egingo du egonaldia herrian. Hiru astera bitarteko egonaldian, literatur lan bat sortzea izango du helburu. Udalak «poztasuna» adierazi du kultur sortzailea euren artean edukiko dutelako eta udal ordezkariek esan dute berekin batera prozesu «aberasgarri eta emankor» bat garatzeko gogoz daudela.
Sortutako kultur lan horiek erakusteko, gerora, Udalbiltzak zirkuitu bat osatuko du egonaldia egin duten herri horietan guztietan.