Ikertzaileek bildutako informazioan oinarrituta atxilotutako pertsona hori droga-banatzaile gisa aritzen zen. Antza "aldian behin" biltzen zen erosle ezberdinekin herrian bertan edo inguruko herrietan droga saltzeko. Pasa den ostiralean atxilotu zuten eta etxebizitza bat miatu zuten Tolosako 4. Instrukzio Epaitegiak baimenduta eta gainbegiratuta. "Miaketa horretan haxix eta marihuana kopuru ezberdinak aurkitu zituzten, bai eta kokaina zuten ehun bat dosi ere plastikozko poltsatxotan prestatuta, berehala banatzeko prest. Horrez gainera, bi doitasun-balantza, substantzia dosifikatzeko elementuak eta billetetan banatuta lau mila euro inguru aurkitu zituzten, segur aski drogaren salmentakoak", gaineratu du Segurtasun sailak. Igandean jarri zuten agintaritza judizialaren eskuetan eta behin-behinean aske utzi zuten karguak egotzita.