Amasa-Villabonako Udalak ikurrinak jarriko ditu herritarren eskura apirilaren 4an ospatuko den Aberri Egunaren harira. Nahi duenak ikurrina bat doan eskuratu ahal izango du. Horretarako Herritarren Arreta Zerbitzura gerturatu ahal izango dira 09:00etatik 14:00etara, eta bertan jaso ikurrina; Edo bestela, e-mail bidali dezakete zuretzat@villabona.eus helbidera, izen-abizenak eta helbidea zehaztuz. Egun gutxira postontzian jasoko dute ikurrina, eskaera egin duten herritarrek.
Amasa-Villabonako Udalak, pertsona guztien oinarrizko eskubideen bermean, askatasun indibidual eta kolektiboetan, berdintasunean eta elkarrenganako errespetuan oinarritzen den euskal komunitatea aldarrikatu nahi du 2021ko Aberri Egunean. "Euskal Herriak, munduko beste nazio guztiek bezala, aitortza merezi duela aldarrikatzeko eguna da. Euskal nazioa ez dugu inondik inora ikuspuntu itxi eta baztertzaile batetik aldarrikatzen. Gure herrian nazio nortasun edo identitate ezberdin ugari dituzten pertsonak bizi gara, eta guztiak dira neurri berean errespetagarriak", esan du Amasa-Villabonako Udalak.