Amasa-Villabona Udalerri Euskaldunen Mankomunitateko kide izango da. Martxoaren 30eko osoko bilkuran eztabaidatu eta hartuko dute erabakia hautetsiek. Batzar horretan Uemako estatutuak onartuko dira, eta mankomunitateari Amasa-Villabona mankomunitateko kide gisa onartzeko eskaera formala luzatuko zaio. "Honek guztiak, euskararen normalizazio lanean udalaren lana indartzea ekarriko du", esan dute udal ordezkariek.
Udalak erabaki garrantzitsu honen berri emateko, AMAVI udal aldizkariaren ale berezi bat argitaratu du, eta aste honetan bertan herriko etxe guztietara banatuko du. Era berean, bideo bat ere kaleratu du Udalerri Euskaldunen Mankomunitatearen nondik norakoak azalduz eta Amasa-Villabonan euskararen egoera zein den azpimarratuz.
Uemaren Batzar Nagusia Amasa-Villabonan
Batzar Nagusia da Udalerri Euskaldunen Mankomunitateko erabakigune nagusia, eta aurten Amasa-Villabonan izango da maiatzaren 29an, Gurea Antzokian. Besteak beste, egun horretan bertan ofizialki onartuko du Uemak Amasa-Villabona mankomunitateko 89. udalerri gisa.