Hurrengo osoko bilkuran aztertzeko mozioa aurkeztu du Maria Luisa Arija PSE-EEko zinegotziak. Mugikortasun mugatua duten pertsonentzat egokitutako edukiontziak jartzea eskatzen du bertan.
Zinegotzi sozialistak aipatu duenez bizilagun guztien irisgarritasunaren alde egin behar du lan udalak eta mugikortasun mugatua duten pertsonei edo adinekoei "bizitza errazagoa" egiteko neurria izango da edukiontziak egokitzea. "Hauetako askok zailtasunak dituzte hondakinak edukiontzietan uzteko ez baitira bertara iristen, baina berdina gertatzen zaie baita ere umeei".
Mozioa onartuko balitz udalak Tolosaldeko Mankomunitateari "lehenbailehen" eskatu beharko lioke edukiontzi egokituak jartzea, Arijak aipatu duenez. Aldi berean, zinegotzi sozialistak udaleko Gizarte Zerbitzuei eskatu die azterketa egiteko, mugikortasun mugatua duten pertsonak non bizitzen diren jakiteko, "lehentasunez edukiontzi egokituak non jarri daitezkeen kontuan hartzeko".