Amasa-Villabonan zorteko dira. Ostegun gaueko kupoiaren zozketak 175.000 euro banatu ditu saritan; 5 kupoi denera, bakoitza 35.000 euroko sariarekin. Beste behin ere, Ana Garitano Olasagasti ONCEko saltzailea izan da zortea banatu duena.
Garitanok 20 urte inguru daramatza ONCEko saltzaile lanetan, eta atzo goizean, saltokia zabaldu berritan, honela zioen: "Atzo (ostegunean) kupoi guztiak saldu nituen, eta une batetik bestera ohiko bezero bat noiz agertuko zain nago, ezustekoa emateko, ez baitu imajinatuko sarietako bat duenik".
Denbora gutxian bigarren aldia da Garitanok herrian zortea banatzen duena; ekainaren 21ean, konfinamenduaren ondoren salmentara itzuli eta egun gutxira, Villabonan bertan, hamar urtez hilean 2.000 euroko sueldazo bat banatu zuen.