Polizia ikerketa urte hasieran abiatu zen eta urriaren 18an eman zituen lehenengo emaitzak. Marihuana trafikoaz akusatutako taldeko burua eta beste kide bat atxilotu zituzten Irunen, AP-8 autobideko bidesarian, marihuana gainean zeramatela. Egun horretan bertan beste kide bat atxilotu zuten Irunen.
Bere aldetik Polizia Nazionalak eta Zerga Administrazioko Estatu Agentziak beste lau lagun atxilotu ditu egunotan Andaluzian, Marbella eta Villaverde del Rio herrietan.
Droga trafikoaz egotzitako talde kriminala laguntzagatik 34 urteko beste pertsona bat atxilotu dute Villabonan. Sustantzia hauen garraioan laguntzea egozten diote eta espetxeratu egin dute.
Atxiloketa guztiak urriaren 18tik 20ra bitartean egin dira eta atxilotutako pertsonak 20eta 60 urte artekoak dira. Baionan ere sare honekin lotura dutelakoan beste bi pertsona atxilotu dituzte. Gainera, poliziak erregistroak egin ditu Irunen, Marbellan eta Villaverde del Rion. Bi marihuana landaketa desegin eta hiru ibilgailu eta bi furgoneta atxiki zituzten, baita itsasontzi eta itsas motor bat ere, Gibraltarretik barrena Marokotik droga garraiatzeko erabiltzen zituztenak.