Izan ere, Eusko Jaurlaritzak bihartik aurrera ezarri nahi dituen neurri berrien arabera, federatu gabe dauden kirolarien lehiaketak ezingo dira egin, eta ezaugarri hori du Amasako Mendi Duatloiak.
Mendi duatloiak batez ere kirolari herrikoientzat pentsatutako probak dira, eta ez dago zertan federatuta egon behar. «Arau berri hori ateratzen den unetik aurrera, ezingo dugu proba egin», zehaztu du Gurrutxagak. «Antolaketa lanak egiten jarraitu ostegunera edo ostiralera arte eta bat-batean ezerezean geratzea ez zen plana, eta egoerak ere ez du uzten, beraz, hori dena kontuan hartuta hartu dugu erabakia». Orain arte lau mendi duatloi egin dira, eta Amasakoa egitear zegoela bertan behera uztea penaz hartutako erabakia izan dela gaineratu du Gurrutxagak.
Euskal Herriko Mendi Duatloien Zirkuituaren barruan, Adunakoa litzateke hurrengoa, azaroaren 7an, azkena izango litzatekeena. «Adunako antolatzaileekin ez dut hitz egin, baina araua martxan jartzean, ez dut uste bi aste barru kenduko dutenik. Tamalez, beraiek ere gure egoera antzekoan izango dira», esan du Gurrutxagak.