Gripearen aurkako txertoak jartzen hasiko dira Gurea aretoan

Aurten, antolaketa arrazoiengatik, txertoa Villabonako Gurea zine aretoan jarriko da 10:15etik 16:30era. Hitzordua eskatu beharko da aurrez, herriko osasun etxera deituta, 943 00 69 70. Urriaren 13an hasiko dira txertaketak.

Gripea oso kutsakorra denez, oso azkar hedatzen da. Pertsona gazte eta osasuntsuei eragiten dienean ez du arazo handiegirik sortzen, eta ohean atseden hartuz eta sendagai egokiekin pasatzen da. Baina, adinekoei edo osasun-arazoak dituztenei eragiten dienean, konplikazio larriak sortu ditzake. Beraz, talde horietako lagunentzat bereziki mesedegarria da txertoa jartzea. Horregatik, Amasa-Villabonako Udalak urriaren 13an hasiko den gripearen aurkako txertaketa-kanpainan parte hartzera gonbidatu ditu herritarrak.


Kanpaina honetan txertatuko diren pertsonak 65 urtetik gorakoak eta arrisku-talde nagusienetakoak dira (BGBK, diabetesa dutenak, gaixotasun kardiobaskularrak dituztenak eta haurdun daudenak). Osasungintzako profesionalak, langile sozio-sanitarioak eta familia-inguruneko zaintzaileak ere txertatuko dira.Txertoa jarri nahi dutenek baina aurreko taldeetako batean ez dauden pertsonek urriaren 31tik aurrera deitu beharko dute anbulatoriora, lehen fasean arestian deskribatutako arrisku taldeei emango baitzaie lehentasuna.

Azkenik, Amasa-Villabonako Udalak eskerrak eman nahi dizkie herritar guztiei eman duten laguntzagatik eta parte hartzeagatik.

 

Albiste hau ATARIKIDEei esker argitaratu dezakegu. Haiei esker Tolosaldeko albisteak libre, euskaraz eta kalitatez irakurtzen dituzu. Horrela izaten jarraitzeko eman babesa Tolosaldeko Atariari eta ZU ERE IZAN ZAITEZ ATARIKIDE.

#EgitenDuzunaGara


EGIN ATARIKIDE!