2014an garatutako parte hartze prozesuaren ondoren, herritarren bozketa zuzenaren bidez hautatua izan zen proiektua "behingoz" errealitate bat izango dela aipatu du Amasa-Villabonako Udalak.
Udal gobernuak oso garrantzitsutzat du proiektu hau egikaritzea, "Villabonako herrigunean betidanik egon den gune estali gehiago edukitzeko beharrari eta herritarren eskaerari erantzuten baitio". Pausoz pauso, hilabete gutxiren buruan lanak hasteko moduan egongo dela jakinarazi du udalak Hirigintza eta Ingurumen Batzorde Informatzailearen astearte honetako (irailaren 22an) bilkuran, proiektua ontzat eman eta onartzea erabaki ondoren. Udal arkitektoak proiektua aztertu eta gero, "aldeko iritzia" jasotzen duen txostena egin, eta beraz, ondorengo urratsa, proiektu honetako lanak zein enpresak egingo dituen zehaztea izango da. Horretarako, esleipen prozesu publiko eta irekiari hasiera emango dio udaleko kontratazio mahaiak.
Proiektuaren datu nagusiak:
- Lekua: Larrea auzoko "Behe Nafarroa" izeneko parkea.
- Estaliko den azalera: 31,43 m x 7,70 m: 242,01 m2.
- Altuera: 5,19 m
- Estruktura: Habeak, pilareak eta uhal metalikoak. Alde motzetan hormigoizko hormak.
- Estalkia: Polikarbonatozko estalkia
- Lizitazioaren oinarrizko aurrekontua guztira (BEZ barne): 174.176,61 €
- Finantziazioa: Udal gerakina (gaur egun 1.373.198,60 euroko funtsa)
Adostasun politikorik ez
Hirigintza Batzordean ez zen erabateko adostasunik izan. Proiektuaren onarpen proposamenak EH Bildu eta PSEren aldeko bozkak izan zituen eta EAJren kontrakoa.