Pentsio duinak eskatzeko elkarretaratzea egin dute pentsiodunek. 1.080 euroko gutxieneko pentsioa eskatu dute mobilizazioarekin. Horrekin batera, mendekotasuna duten adinekoen egoitzen egoera "kezkagarria" salatu dute.
Mendekoen egoitzetan izandako heriotza guztien %40 pandemiak eragindakoa izan zela adierazi dute pentsiodunek, pandemiaren lehen olatuan. Bizkaiko eta Arabako Babestu elkarteak, Arabako egoitzetako eta eguneko zentroetako erabiltzaileen senitartekoak, Gipuzkoako Senideak, Irauli Zaintza taldeak eta pentsiodunen mugimenduak "haserrea eta kezka" adierazi dute.
Pentsiodunek uste dute "ulertezina" dela sei hilabeteko pandemiaren ondoren egoitza eta zentroak kutsatzeko gune izaten jarraitzea. "Agerikoa da prebentzioko, detekzio goiztiarreko eta ikuskapeneko protokoloek ez dutela funtzionatzen; pertsonen arteko babes neurriak ez direla nahikoa; egoitzak askotan, ez direla erabiltzen kutsatzea modu eraginkorrean zaintzeko; zentroek ez zaizkiela eman erabiltzaileen osasuna bermatzeko behar diren baliabide materialak".
Osasun larrialdiko batzordeak autokritikarik eta hausnarketarik ez duela egin uste dute pentsiodunek, pandemiaren bigarren olatua etorri ondoren. "Azalpen publiko bat eskatzen dugu, jakiteko zergatik jarraitzen duen egoitzen egoera kritikoa izaten eta ekainean egoitzak eta eguneko zentroak COVID-19tik zentro libreak izendatu zirenetik zer egin den jakiteko".
Lehendakariari eskatu diote aginte bakarraren zuzendari den neurrian galdera hauei erantzuna emateko.