Amasa-Villabonako Arroa auzoko Fleming Herri Eskolaren jolaslekuan estalpe berria egiteko lanak aste honetan hasi dituzte. Amasa-Villabonako Udalak eta Fleming Herri Eskolako zuzendaritzak, iazko ikasturte amaieran, proiektu hau gauzatzea adostu zuten. Udalak urtez urte eskola publikoan inbertsioak egiteko martxan jarria duen programaren barruan kokatzen dira lan hauek.
Urte hasieran Eusko Jaurlaritzari diru laguntza eskaera egin zion udalak, baina Jaurlaritzak maiatzean jakinarazi zien "ez zuela proiektu hau diruz lagunduko". 56.203,94 euroko aurrekontua du gauzatzen ari diren obrak, eta bi hilabetean amaituta egotea espero dute.
125 m² estaliko dira
Arroa auzoan dagoen eraikina Haur Hezkuntzako ikasleen eskola da. Aste honetan hasi diren obrak amaitzen direnean, Fleming Herri Eskolako haurrek jolastokian azalera handiagoa izango dute estalita, batik bat, euria egiten duen egunetarako. "Espazioa nabarmen handituko da", adierazi dute udaletik.
Jolastokiaren hegoaldeko eta mendebaldeko aldeetan zabalduko da estalpe berria.