Amasa-Villabonako Udalak Berpiztu dinamikaren filosofiaren barruan egin duen bigarren ekimena izan da gaurkoa, eta herritarrek ondo erantzun diote deialdiari.
Santiago Egoitzaren atarian eta Osasun Zentroaren atarian loreak eta mezuak zintzilikatzeko deia egina zuten. Lore asko eta mezu ugari izan dira utzi dituztenak. Tartean, udal ordezkariak ere aritu dira lore eta mezuak jartzen. Santiago egoitza eta osasun etxeko langileek adinekoen eta orokorrean herritar guztien arretan eta zaintzan egin duten lana aitortu, eta txalotzeko omenaldia izan da. "Osasun sistema publikoaren garrantzia azpimarratu eta langileak baldintza duinagoetan lan egin behar dutela aldarrikatzekoa", diote udal ordezkariek.
Tantaka-tantaka herritarrek ere beraien mezu eta loreak jarri dituzte. "Eutsi gogor", "Denon artean lortuko dugu", "Mila esker birusaren aurrean egindako guztiagatik" edota "Eskerrik asko zuen gogo, ilusio eta kemenagatik" dira mezu askoren artean irakur daitezkeenetako batzuk.
Santiago Egoitzako egoiliar eta langileetako batzuk ere ate ingurura gerturatu dira esker hitz eta keinuekin.