Ander Goikoetxea zinegotziak azaldu duenez, "une honetan astero 60 familia ingururi ari gara banaketa egiten, eta aukera eman nahi izan diogu herritarrei beraien ekarpena egiteko". Herriko hainbat dendetan jarri dituzte kaxak bilketa egiteko, eta horrez gain, bi supermerkatuen kanpoaldean mahaiak jarri dituzte produktuak jasotzeko. Bilketa "oso ondo" joan dela azaldu du Goikoetxeak: "Egia esan espero genuen herritarrek erantzuna ematea horrelako dinamika bati eta horrela izan da. Datorren hilabetean ez dugu arazorik izango beharra duten familiei produktuak banatzeko".
Berpiztu Amasa-Villabona kanpainaren barruan kokatu du udalak egitasmoa. "Osasun krisiaren irteera honetan hainbat ardatz ezinbesteko ikusi ditugu eta horiek bildu ditugu kanpainan: herriko komertzio eta ostalaritzari laguntza ematea, herriko kaleak bizirik mantendu daitezen; beharrak dituztenei laguntzea, janari bilketarekin egiten ari garen moduan; ahal dugun neurrian osasun sistema babestu eta zaharren egoitzari laguntza eta babesa ematea, bai bere lanean eta beraien aldarrikapenetan ere, eta, bestetik, itxialdi hau gehien sufritu duten adineko eta haurrentzat jarduerak eta ekimenak bultzatzea modu herrikoi eta parte hartzaile batean", azaldu du Goikoetxeak. Janari bilketaren egitasmoa herritarrek "jarrera positiboarekin" hartu dutela gaineratu du: "Osasun krisi honen ondoren ere krisi ekonomiko eta sozial bat etorri daitekeela-eta, denon ardura eta beharra izango da inor atzean ez uztea. Eta bide horretan jendea bere ekarpena egiteko prest dago".
Produktuak astero banatzen dira, udaletxearen alde batean dagoen lokal batean. Gizarte larrialdian dauden familiei deitzen zaie bertara joateko. Udalaren ekimenez sortutako egitasmo hau gehiago herrikotu nahi dute eta asmoa dute herri ekimen bat bultzatzea boluntarioen bidez janari bilketa zein bestelako dinamikak sortzeko helburuz. Aurrerago bilera deialdi bat egingo da herri ekimena martxan jartzeko.