Aurtengo ikasturtean Fleming Herri Eskolan STEAM proiektuaren aldeko apustua egin dute. Proiektu honek bere gain hartzen ditu zientzia, teknologia, ingeniaritza, artea eta matematiken lanketa. Guzti hau modu dibertigarri batean egiteko First Legorena aukera bikaina iruditu zitzaien eta eskola komunitate guztiaren inplikazioarekin horretan ari dira buru-belarri.
Ilusioz ekin diote proiektu berri honi eta ilusio horrek bultzatuta ikasturte hasieran First Lego League topaketan parte hartzea erabaki zuten. Denbora tarte honetan, proiektua prestatzen aritu dira talde lana, inklusioa, sormena, konpromisoa eta berrikuntza baloreak bultzatuz.
Lau hilabete hauetako lanaren emaitza aurkezteko aukera izan zuten joan den otsailaren 8an eta "urduritasuna sumatu zitekeela ukatu ezin badugu ere, egun zoragarria izan zen", esan dute ikastetxetik. Fleming Herri Eskolako ikasleek, hiru taldetan, proiektu "ederrak" aurkezteaz gain, hauek jendaurrean aurkezteko gaitasuna soberan dutela erakutsi zuten.
