Segurtasun sailak esan duenez Ertzaintzak 30 urteko gizonezko bat atxilotu du bart Villabonako udaletxe barruan. Eraikineko ate nagusian kalteak zeudela esan dute eta barrura sartzerakoan aulki batean lo aurkitu dutela. Antza alkoholaren eraginpean zegoen.
Argitu dute ertzainak udaletxera joan direla bertako alarmak jo duelako eta bertaratzerakoan ate nagusian kalteak ikusi dituztela. Gaineratu dute gizonezko bera ordu batzuk lehenago ere identifikatu dutela herriko etxebizitza bateko atariko atea kolpatu duelako. Gizonezkoa Hernaniko Ertzain Etxera eraman dute atxilotuta.