Eguna, ordea, eguraldi aldetik pattala izan bada ere, haur mordo batek parte hartu du lasterketan.
Gerora etorri da herritarren desafioa. Hirunako hiru taldetan banatuta traktore bati tiraka aritu dira. Talde beltza, Joseba 'Pasus', Kepa Nazabal eta Kepa Otegik osatutakoa izan da. Talde urdina, Jon Aizperro, Telmo Gartzia eta baja bat tarteko, azken uneko fitxaketa Beñat Iguaran izan dute. Eta azken taldea, talde gorria izan da: Arkaitz 'Xandra', Urki Galarraga eta Jon 'Beltxa'.
Lehen taldea beltza izan da, eta aldapan gorako ibilbidea, 2 minutu eta 56 segundoko denboran egin dute. Atzetik, talde urdinaren txanda izan da, eta 3 minutu eta 16 segundo behar izan dituzte. Gorriz jantzitako hiru mutilek, berriz, 3 minutu eta 08 segundoan amaitu dute bidea.
Euripean, bustita eta hotzez, guztiak izan dira garaile. Baita, ikusleak ere. Albotik animoak emanez izan dituzte herritarrak.
Herri Bazkarian bilduko dira guztiak, eta gero, 19:00etan, bertso saioa izango da elizan: Jexux Mari Irazu, Maialen Lujanbio, Amets Arzallus eta Uxue Alberdi bertsolariek, Amaia Agirre gai jartzaileari erantzun beharko diote. Ondoren, Martina Sorginari agurra egingo diote.