Orain arte Trinketeko Munduko Kopan jokatutako partidekin zerikusirik ez du izan atzo arratsaldean Eneko Maiz billabonatarrak jokatutakoak. Multzoko ligaxkan Kubako, Txileko eta Estatu Batuetako ordezkariei joko guztiak irabazi ondoren, eta alde handia atereaz markagailuan, finalerdia beste kontu bat izan zen. Lehen jokoa 15-6 irabazi zuen, baina bigarrena 12-15 galdu, eta hirugarrengoan 10-4 gailendu zen billabonatarra.
Orain finalean Frantziako ordezkaria izango du aurkari. Bihar, larunbata, jokatuko da finala, 11:30ean, Pauko Trinketean. Iazko urrian Bartzelonan jokatutako Munduko Txapelketaren finala errepikatuko da, beraz.