Pauen jokatzen ari den Munduko Kopa garaipenarekin hasi du Eneko Maizek, 15-2 eta 15-2ko emaitzarekin Dariel Leyva kubatarraren aurka, ligaxkako lehen partidan. "Horrekin batera heldu da berri garrantzitsu eta pozgarria", azaldu dute Behar Zana Pilota Elkartetik. "Ipar Euskal Herrian, banakako trinketeko Superprestige Txapelketa jokatzeko gonbidatuta izan da". Garazin jokatuko da azaroa eta abenduaren artean. Txapelketa jokatzen duen lehen gipuzkoarra izango da billabonatarra, eta hegoaldeko bigarren pilotaria.
Txapelketa honetan pilotari onenek jokatuko dute eta aukera aparta izango da Eneko Maiz Lasarte pilotariarentzat. Alderaketa bat egite aldera, oraindik afizionatuetan jokatzen duen pilotari bat gaur egungo Altuna III.arekin, Irribarriarekin, Bengoetxearekin eta maila horretako pilotariekin jokatzea da, baina kasu honetan trinketeko onenekin.