Villabonako Oriamendi, Errota eta Arroa auzoetako ur-hornikuntzarako hoditeria aldatu eta hodi berriak ezarzeaz gain, saneamendu sarean ere hobekuntzak egingo dituztela azaldu du Villabonako Udalak: "Gaur egungo hoditeria guztiz zaharkituta dago eta ur galerak eta beste hainbat arazo sortu dira, beraz, eraberritze lan hauek erabat beharrezkoak dira". Guztira, 1.473 metroko luzerako hoditeria aldatuko da.
Lan horiek Gipuzkoako Ur Kontsortzioak egingo ditu, bost hilabeteko epean, eta 390.448,85 euroko aurrekontua dute.
Dagoeneko, Legarreta zubian egin beharreko lanak bukatu dituzte, zubi horretan egiten ari diren zabaltze lanak baliatu baitituzte.
Udalak herritarrei jakinarazi nahi die "saihestezinak izango diren hainbat traba eta arazo" sortuko dituztela obra lanek, izan ere, lubakiak egin beharko dira hiru auzoetan. Lubakiak, gehienbat, errepide alboko espaloietan egingo dituztela aurreratu dute, "espaloi hauen zabalera handia da, beraz, arazoak ez dira horren larriak izango", esan dute.
Hona hemen aldatuko den hoditeriaren ibilbidea erakusten duen planoa:
