2009ko uztailaren 31 zen, Santio jaietako azken eguna, Remi Ayestaran hil zenean. Orduko alkateordea zen, eta poliziarekin izandako eztabaida baten ondoren zendu zen, bihotzekoak jota. Orduz geroztik, Ayestaranen senideek, lagunek eta gertakariaren harira sortutako Remi Gogoan egitasmoak justizia exijitzen dihardute, Remi Ayestaran indarkeria polizialaren biktimatzat ofizialki aitor dezaten. Urteroko moduan, gaur ere omenaldia egin diote.
Efemeridearen zenbakia berezia zen aurten, eta ekitaldia ere hala izan da: lau urtez jaietako egitarau ofizialetik kapo egon eta gero, udal gobernu berriak hitzordua berriro txertatu du Santioetako jardueren zerrendan eta, gainera, hamarkada gogora ekartzeko, Errebote plazara lekualdatu dute omenaldia.
Festa giroan hasi da, gero aldarrikapen forma hartu duen hitzordua, eta lepo bete da Errebote plaza. Ander Goikoetxea, Beñat Iguaran eta Amaia Agirre bertsolariek kantuan ekarri dute gogora, herrikide izandakoa, eta memoriari erreferentzia eginez biribildu du bertsoa Agirrek: "Memoriaren egutegian oraindik loretan zaude".
Horren ondotik, Remi Gogoan taldeko ordezkariak hartu du hitza, zauria itxi gabe dutela azpimarratuz: "Ezin dugu eta ez dugu gertatutakoa ahaztu nahi. Oraindik inork ez du azalpenik eman, ezta ardurarik hartu ere". Remi Ayestaran bortizkeria polizialaren biktimatzat hartzea galdegin dute beste behin, "presio hark hil zuela" gogora ekarriz: "Justizia eskatzen dugu, ez mendekua".
Beren aldetik EH Bilduko udal gobernuko kideek ere bere egin dute Remi Gogoan-en diskurtsoa, eta egia jakiteko beharra izan du hizpide, Beatriz Unzue Amasa-Villabonako alkateak: "Ezinbestekoa da errelato guztien oinarrian egia kokatzea, eta guk ondo dakigu egia zein den". Bide horretan, udalak eta Aranzadi elkarteak biktima guztien aitortza osatzeko abiarazi duten proiektua aipatu du, herriari zor dioten zerbait dela zehaztuz: "Biktima guzti-guztiek merezi dute egia aitortzea, justizia eta errekonozimendu publikoa".
Azkenik, Mikel Ayestaran anaiak hartu du hitza, urteotan guztiotan Remi anaia omentzeko eta haren memoria bizirik mantentzeko beren alea jarri duten guztiei eskerrak emanez. Hark ere, aurrekoek bezala, egia exijitu du, eta 2009ko gertakariaren arduradun politikoen izen-abizenak eskatu.
Ohorezko agurrak eta Remi Ayestaranen izena daraman pasealekuko monolitoko lore-eskaintzak biribildu dute, haren heriotzaren 10. urteurreneko ekitaldia.