Villabonako jaien barruan Santio Txapelketako pilota finalak jokatzen dira. Aurtengoan ere iritsi da hitzordua, eta bi egunetan banatuko dituzte finalak. Gaur, 16:00etatik aurrera, Olaederra pilotalekuan bi final jokatuko dira. Lehenik Otaño eta Huitzik jokatuko dute frontenisean buruz buru. Jarraian, Karrera-Nazabalek eta Iguaran-Otegik eskuz binaka txapelketa herrikoiko finala jokatuko dute.
Uztailaren 28an, igandean, 16:30ean hasiko dira azken finalak. Partida hauek Bear Zana pilotalekuan jokatuko dira.
Lehen partidan emakumeak palaz ariko dira. Aurtengo finalistak Etxaniz-Gonzalez izango dira alde batetik, eta Emeren-Irene, bestetik.
Bigarren finala pala gomaz izango da. Otaño-Loitegik Ayerza-Luixaren aurka jokatuko dute.
20 BIKOTE
Azken eta hirugarren partidan eskuz binaka nagusiek jokatuko dute federatu mailan. 20 bikotek parte hartu dute eta finalean Adonis-Arangurenek (Zazpi Iturri-Amezketa) Urbieta-Esnaolaren (Behar Zana) aurka jokatuko dute. Azken txapela hau irabazten dutenek Gabonetako elite torneoko VIII. Antton Pebet Memorialean jokatzeko aukera izango dute.
