111 Akademiaren saria jaso du Harkaitz Canok

Amasako Hika txakolindegian eman diote akademia kideek saria, 'Fakirraren ahotsa' iaz argitaratutako liburuen artean onena dela iritzita.

Txakolindegiaren upategietara bisita laburra egin ondoren, Olatz Prat, Josune Marin, Txema Garces eta Joxan Goikoetxeak zabaldu zuten emanaldia.

Saritutako lanaren printza batzuk eman zituzten 111 Akademiako kideek eta ondoren hitza hartu zuen Jon Unanuek, akademiako buruak, Fakirraren ahotsa nobelaren inguruan irakurleek egindako iruzkinetako batzuk irakurriz: "Irakurle askorentzat historiografiak berak emango zukeen emaitza baino egiantzekoagoa lortu du; garbi utziz lan handia egin behar izan duela fikzio hori osatzeko. Baina Canok biografia bikain fikzionatzea baino askoz gehiago egin du: bizitzak dakarkigun haustura ugariren aurrean hausnar bideak eskaintzen dizkigu, eta ez nolanahikoak".

Saritutako liburuaren larruz koadernaturiko alea eman zion Ainara Maia akademiako kideak idazleari eta Ariane Obineta Manuel Larramendi kultur bazkuneko lehendakari berriaren eskutik jaso zuen Canok agiria. Eskertuta jaso zuen saria. Fakirraren ahotsa nobelari esker topatu dituen irakurle moten berri eman zuen bere hitzaldian. "Denei ematen dizkiet eskerrak, ni ere irakurle horietako bat izan naizelako momenturen batean, beraz, mila esker bihotzez".

Hika txakolindegiko Roberto Ruiz sukaldariak prestatutako zizka-mizkak dastatu zituzten sari emate ekitaldira gerturatutakoek.

Hiru fasetan banatuta 102 kidek parte hartu dute bozketan, eta azken fasean, Katixa Agirreren Amek ez dute eleberria izan du lehiakide Harkaitz Canoren nobelak. 23. edizioa izan da aurtengoa eta Lasarteko idazleari bigarren aldiz eman diote, aurrez 2011n, Twist eleberriagatik jaso baitzuen ohorezko aipamena.

Tolosaldeko albisteak euskaraz, libre eta kalitatez jasotzea nahi duzu?

Horretarako zure babesa ezinbestekoa zaigu. Egin zaitez Atarikide!


EGIN ATARIKIDE!