Hiru fasetan banatuta 102 kidek parte hartu dute bozketan, eta azken fasean, Katixa Agirreren Amek ez dute eleberria izan du lehiakide Harkaitz Canoren nobelak.
2012. urtera arte Beterriko Liburua izena zuen sariketak eta Beterri-Aiztondo eskualdeko udaletxeetan txandaka egiten zen sari emate ekitaldia. Azken urteetan Andoaingo Bastero kulturgunean eman izan dute saria, baina aurten Amasako Hika txakolindegira aldatuko dute ekitaldia.
23. edizioa izango da aurtengoa eta Lasarteko idazleari bigarren aldiz emango diote, aurrez 2011n, Twist eleberriagatik jaso baitzuen ohorezko aipamena. Sari hau bi aldiz irabazi izan dute Ramon Saizarbitoriak (Gorde nazazu lurpean, 2000 eta Martutene, 2012) eta Anjel Lertxundik (Zorion perfektua, 2002 eta Zoaz infernura laztana, 2008).
19:00ean hasiko da Hika Txakolindegian sari banaketa ekitaldia. Upategietara bisita egingo dute aurrena eta 19:15ean Olatz Prat, Josune Marin eta Joxan Goikoetxea musikariek emanaldia eskainiko dute. Segidan saritutako obraren printzak emango dituzte eta 19:30ean hasiko da sari ematea. Harkaitz Canok hitz batzuk ere esango ditu. Saritutako lanaren azken printzak eman eta musikarien bigarren emanaldiaren ondotik, Roberto Ruiz sukaldariak prestaturiko zizka-mizkak dastatu ahal izango dira.