Korrikalariak 90 metroan dagoen Amasatik abiatu dira, eta 631 metroko Loatzo mendia igo ostean, Amasan bertan izan dute helmuga ere. Aurtengo XXVII. edizioa izan da, eta 9,73 kilometro egin behar izan dituzte. Guztira, 53 parte hartzaile izan dira, zortzi emakume eta 45 gizon, hain zuzen ere. Amasako gazteek eta Uxo Toki elkarteak antolatu dute lasterketa, eta amaieran, guztiek hamaiketakoa egin dute Uxo Toki elkartean.
Sailkapenei dagokienez, Hassan Ait Chaou billabonatarrak eta Maialen Gurrutxaga andoaindarra sailkatu dira lehenengo postuan. 44 minutu eta segundo bat eta 56 minutu eta 28 segundo behar izan dituzte Loatzo igo eta jaisteko, hurrenez hurren. Bigarren postuan sailkatutako Aitor Regillaga tolosarrak 45 minutu eta 21 segundoko denbora egin du eta Oihana Zubillaga anoetarrak 58 minutu eta 3 segundokoa. Hirugarren sailkatu den Aguraingo Xabier Vegasek, berriz, 45 minutu eta 48 segundo behar izan ditu eta Anoetako Kontxi Blancok ordubete 2 minutu eta 37 segundo. Seigarren postuan, Eñaut Galarraga izan da lehen amasarra 48 minutu eta 7 segundoko denborarekin.