Kultur egitarauak kalitatezko kultur askotariko ekitaldiak eskainiko ditu aste honetan ere. Kronologikoki, lehenengo hitzordua Toti Martinez de Lezea idazle gazteiztar arrakastatsuarekin izango da, ostegun honetan, hilak 21, AV 400 “2 herri, helburu bat” hitzaldien zikloen barruan eskainiko du hitzaldia, Subijana etxean, 19:00etan, Gure herriko emakumezkoen iragana izenburupean.
Bi egun beranduago, euskal dantzak izango dira protagonistak Dantzari Eguna ospatuko baita. Goizeko 11:30etik aurrera, herriko kaleak kolorez eta dantzaz beteko dira; 13:00etan, Oinkari dantza eskolako dantzariak Malkar plazan jardungo dira eta Behar Zana frontoian burutuko den herri bazkariaren ondoren, erromeria izango da leku berean, Bide Batez erromeri taldearen eskutik.
Eta kultur aste honi amaiera emateko, Ertza antzerki taldeak Janeten titia euskarazko antzerkia aurkeztuko du martxoaren 24an, Gurea Zinean, 19:30ean. Bertan, normala denaren eta ez denaren inguruko hausnarketa interesgarria egiten da; nola gizarteek normal kontzeptuarekin modu subjektiboan jokatzen duten, askotan beraien interes propioko kriterioak ezarriz. Eszenaratze interesgarri eta dinamiko hau, 2018ko DFeria, Donostiako antzerki feria, entzutetsurako aukeratua izan zen.