M8 Emakumeen Nazioarteko Eguna 2019

Bide urratzaileak izateagatik aitortza jaso dute

1979ko apirilaren 3an egin ziren frankismoaren osteko lehen udal hauteskunde libreak eta Bittori Zeberio eta Arantxa Sorondo zinegotzi atera ziren. Demokrazia aroko herriko lehen bi emakume zinegotziak izateagatik aitortza jaso dute Amasa-Villabonako udaletxean.

Agurra dantzatu diete bi zinegotziei eta lore sorta bana eman diete, opariekin batera. Aitortza eta omenaldi ekitaldian, egungo alkate Maite Izagirrek hartu du hitza lehenik: "Lehenengoak izan zineten eta bidea ireki zeniguten. Jakin ezazue aitzindariak izan zinetela eta zuei esker emakumeak politikan jardutea gauza normala dela gaur egun. Ezina ekinez bihurtu zenuten. Zuek eraikitako kate sendo eta luze hori bizirik dago, inoiz baino biziago eta indartsuago".

1979ko lehenengo udal hauteskunde demokratiko horietara bost hautagaitza aurkeztu ziren: EAJ, Agrupación de Electores, ORT, EE eta EMK-OIC. Izendatutako 13 zinegotzien artean, bi baino ez ziren emakumezkoak, EAJren zerrendan bigarren zihoan Zeberio eta Agrupación de Electores delako hautagaitzaren zerrendan hirugarren zihoan Sorondo. Azken honek, gainera, udal gobernuan hartu zuen parte Karlos Etxenike alkate zela.

"Bi emakume abertzale ziren, euskara maite zutenak eta momentu horretan erabaki ausarta hartu zuten: hautagaitza politiko batean parte hartzea eta lehen postuetan joatea, kargu publiko izango zirela jakinda", esan du Izagirrek. "Moldeak puskatu zenituzten eta baita beirazko sabaiak ere".

Ekitaldian aitortza jaso duen Arantxa Sorondok ere hitz egin du eta garai horretan gizarte berri bat amestuz proiektu ezberdinetan lanean aritu ziren emakume guztien hartu ditu gogoan omenaldia jasotzerakoan. Hala ere, ekitaldia "gazi-gozoa" suertatu zaiola aipatu du: "Gaur egun badaudelako, garai horretan bezala, ilusio, gogo eta kemenez betetako emakumeak gizarte hau aldatzeko apustua egin dutenak". Lurgatz talde feministako kideez aritu da, berak ere taldean parte hartzen baitu. Talde feminista, irekia, askotarikoa, apartidista, asanblearioa eta hiru belaunaldiko emakumez osatua dela aipatu du Sorondok, baina salatu du, udaleko gehiengoa osatzen dutenen aldetik "traba eta oztopoak" baino ez dituela jaso Lurgatzek. Horregatik eskaera bat luzatu die gaur egun egun zinegotzi diren sei emakumezko zinegotziei: "Arazo hau gainditzeko bidea bilatu dezazuen animatzen zaituztet".

Hain justu, egungo emakumezko zinegotzi eta garai batean izan zirenekin argazkiak atera dituzte bi omenduek. Ekitaldian izan dira, baita ere, Amasa-Villabonako alkate izan diren Maixabel Arrieta eta Bakartxo Tejeria. Guztiek elkarrekin eta hamaiketakoa dastatuz amaitu dute aitortza ekitaldia.

Albiste hau ATARIKIDEei esker argitaratu dezakegu. Haiei esker Tolosaldeko albisteak libre, euskaraz eta kalitatez irakurtzen dituzu. Horrela izaten jarraitzeko eman babesa Tolosaldeko Atariari eta ZU ERE IZAN ZAITEZ ATARIKIDE.

BATAK BESTEA DAKAR


EGIN ATARIKIDE!