Pintura, eskultura eta idazlanak biltzen dituen obra aurkeztu zuen, otsailaren 8an, Ramon Balerdik (Donostia, 1964), Villabonan bizi den artistak. Aurkezpen ekitaldian Maite Izagirre alkateak nabarmendu zuenez, «bere lanetan justua eta gizatiarra ez den sistemari kritika sakona egiten dio». Bere lan artistikoan inspirazio iturri diren «iraultza, lana eta espiritua» kontzeptuak aipatu zituen alkateak.
Via Crucis izeneko bilduman gurutzea da lan askotan ageri dena, egilearen hitzetan: «Erruduntasunaren eta heriotzaren sinbolo gisa azaltzen zaigun arren, Kataroentzat, adibidez, gurutziltzatzea arimaren katarsia da, eta norberaren ezagutzarentzat bidea». 2001ean idatzitako poema bat irakurri zuen Balerdik, inaugurazio ekitaldian.
Osabari, iazko apirilean zendutako Juan Miguel Balerdi Mitxino billabonatarri eskaini nahi izan dio artistak mostra. Otsailaren 23ra bitarte izango da ikusgai, Gureako erakusketa gelan.