Tolosaldeko Mankomunitateak biltzen dituen udalerrietatik, biztanleriari begiratuta, hirugarren handiena da Amasa-Villabona, Tolosa eta Andoainen atzetik. Mankomunitatea osatzen duten 25 udalerrietan hiri- hondakin solidoak gaika biltzeko erabiltzen diren edukiontziak berritzea erabaki zuten orain dela aste batzuk.
Legealdi honetan hasitako etengabeko hobekuntza lerroarekin jarraituz, eta Kolorez Kolore azken sentsibilizazio kanpainan jasotako herritarren nahiak kontuan izanik, Amasa-Villabonako Udalak, edukiontzi marroi eta grisak pedal sistemarekin ipintzea erabaki du, gaur egungo edukiontziak irekitzeko zailtasunak dituzten adineko pertsonen erabilpena errazteko.
Gobernu taldea, asteazken gauen egiten den hondakin handien bilketa bereziko zerbitzuaren erabilera egokia areagotzeko sentsibilizazio kanpaina berri bat martxan jartzea aztertzen ari da. Maite Izagirre alkateak dioenez, “kontzientziazioa eta sentsibilizazioa dira gaikako bilketa eta gizalegea sustatzeko biderik eraginkorrenak; neurri errepresiboak gizarte sumina sortzeko balio izan zuten”.
