Irlandako Glencree hiriko Bake eta Adiskidetze zentroan, 2007an eta Eusko Jaurlaritzako Terrorismoko Biktimei Laguntzeko Zuzendaritzak bultzatuta, ETA, GAL eta eskuin muturreko biktimak biltzen hasi ziren. Esperientzia hau sekretuan gorde zen 2012. urtera arte, eta orduan bildu zituzten dokumentu batean 27 biktimen bizipenak, «jasandako biolentzia guztiak, oinarrian bidegabeak» izan zirela nabarmenduz.
Hurrengo urtean, 2013an, K2000 enpresak EITBrako ekoitzi zuen Glencree, el camino recorrido juntos dokumentala , Maite Ibañezek zuzendu zuena. Ostiralean, 19:00etan, Villabonako Gurea aretoan eskainiko dute eta behin filma ikusita, solasaldian parte hartuko dute, Ibañezek berak eta 1975ean fusilatutako Jon Paredes Txiki etakidearen anaiak, Mikel Paredesek. Azken honek, Glencree hiriko esperientzian parte hartu zuen.
Amasa-Villabonako Udaleko Memoria eta Bizikidetza batzordeak antolatu du emanaldia, legealdi honetan hasitako giza eskubideen aintzatespenaren eta errespetuaren onuran egindako lanekin jarraitzeko. Aurrez, azaroan, Mujeres en construcción dokumentala eman zuten.