Moda gehigarria

Kaori Faktoria. Moda jasangarria

Artisautzaren munduan murgildu dira Lurgi Zalakain eta Nahikari Iturbe. Afrikara bidaiatu eta estanpatutako tela koloretsuak ezagutu zituen Zalakainek eta «erakargarriak» egin zitzaizkion.

Estanpatu horiekin arropa eta osagarriak euren erara apaintzen dituztela dio Iturbek. Oraingoz Afrikako estanpatuak erabiltzen dituzte, baina ez dute baztertzen munduko beste leku batzuetako oihalak ere erabiltzea.

Proiektu berria da Kaori Faktoria. Irailean ireki zuten denda, Villabonan. Urteak pasa ahala, Zalakainek sentitzen zuen Kaorik “indarra behar zuela” eta horregatik erabaki zuten denda fisikoa irekitzea.

Nahikari Iturbek dio «naturan eta gizartean eragina ahalik eta baxuena izaten saiatzen» direla, izan ere, Kaoriko arropek ingurumena zaintzen dutela bermatzen duen zigilua daramate. Beraien helburua da joskintza-artisautza ezagutaraztea eta euren diseinuen prozesua Faktorian hasi eta bukatzen dela ziurtatzen dute.

Izan ere, Faktoriako langileen iritziz, gaur egun kontsumismoaren ondorioz, erosi, erabili eta bota egiten dugu, «nork, norentzat eta nola egiten den begiratu gabe». Jendeari erakutsi nahi diote beste era batera lan egin daitekeela, eta horrela «bizitza janzteko beste modu batzuk» ere badaudela. Horregatik, saiatu dira Kaorin hausnarketa egiten eta beste era bateko ekoizpena egiten, «kultura, jatorri, gorputz, hizkuntza eta genero aniztasuna» ardatz dutelarik.

Datuak

Helbidea: Kale Nagusia, 26, Villabona
Telefonoa: 943 539 652
Facebook: Kaori Faktoria
Instagram: kaori_faktoria
Webgunea: kaorifaktoria.com

Albiste hau ATARIKIDEei esker argitaratu dezakegu. Haiei esker Tolosaldeko albisteak libre, euskaraz eta kalitatez irakurtzen dituzu. Horrela izaten jarraitzeko eman babesa Tolosaldeko Atariari eta ZU ERE IZAN ZAITEZ ATARIKIDE.

BATAK BESTEA DAKAR


EGIN ATARIKIDE!