Villabonako Udaleko Memoria eta Bizikidetza batzordea EAJ, EH Bildu eta PSE-EEko ordezkariez osatuta dago. "Etorkizun baketsu baten aldeko apustua" egiten duela adierazi dute, "inolako kausa politiko, giza eskubideen, pertsonen eta bizitzaren balioaren gainetik jarriko ez dena".
2016tik hona herriko memoria eta elkarbizitzaren esparruan egindako ibilbidearen eta lortutako akordioen berri eman dute ere agerraldian. Batetik, alderdi guztiek aho batez erabaki dute Aranzadi Zientzi Elkarteari ikerketa zientifiko bat egitea eskatzea. "Ikerketa horren helburua azken hamarkada luzeetan gure herrian bizi izan diren giza eskubideen urraketa guztiak biltzea izango da, bai Amasa-Villabonako biztanleek pairatutakoak, baita Amasa-Villabonan bertan gertatu direnak ere", zehaztu dute, eta gaineratu: "Garrantzitsua baita gure herrian gertatutako egia guztiak jasotzea eta giza eskubideen urraketa ezberdinak pairatu dituzten biktima guztiak aitortuak izatea".
Bestalde, gaiarekin lotutako bi dokumental proiektatuko dira Gurea zinema aretoan. Azaroaren 30an, Begoña Atin eta Maite Ibañezek egindako Mujeres en construcción, eta abenduaren 14an Maite Ibañezek egindako Glencree izenekoa. Bi dokumentalak 19:30ean emango dira eta amaitzean haien inguruko solasaldia egiteko aukera izango da.
Azkenik, Villabonako Udaleko Memoria eta Bizikidetza batzordeak hasi duen bidearekin jarraitzeko borondatea berretsi du publikoki: "Ezinbestekoa deritzogu-eta iraganean gertatutakoak berriz gertatuko ez direla bermatzea".