Jendea apustu gosez joan da Amasara. Bertako gazteak korrika eta segaz aritzekoak ziren, baina lesio bat tarteko, segaz bakarrik aritu dira. Yeray Otaegi Motxe eta Kepa Nazabal Organista izan dira kilo gehien bildu dituztenak. Joseba Astiasaran Pasus eta Aitor Otamendi Ota hasieratik geratu dira atzean. Azken honek Mikel Arretxe Sandra ordezkatu du. Korrika hasi orduko belaunean min hartu du Sandra-k, eta proba hori bertan behera geratu da. Azkenean, 30 minutuko sega saioak erabaki du desafioaren irabazleak zeintzuk izango ziren.
Ondoren jendea Amasako plazara joan da. Lizartzako txaranga bertan zuten zain, baina batez ere txakolina. Antolatzaileak ere gustura geratu dira gaurko egunean izan duten erantzunarekin.