89 urte dira uztailaren 31n errebote partidak antolatzen hasi zirenetik. Gerora Behar Zana Pilota Elkarteak hartu zuen antolaketaren ardura.
Villabona eta Hazparne aritu dira, aurten, nor baino nor gehiago. Etxeko taldearekin Ion Ander Artola, Beñat Iraola, Aratz Luisa, Iñaki Otaegi eta Beñat Karrera aritu dira. Hazparneko taldearekin, berriz, Jon Larronde, Mateu Arrieta, Pello Larramendi, Ivan Bidegain eta Antoni Argindegik jokatu dute.
Neurketa ia ordubeteko atzerapenarekin hasi da, garbiketa lanen ondoren lurra oraindik oso bustia baitzegoen. Herri lanetako langileak makinekin lehortzen aritu dira. Hori dela eta, 13 jokotara egin beharrean, bederatzira egitea erabaki dute.
Lurraren egoera jokatzeko onena izan ez arren, neurketa polita jokatu dute. Ohikoa baino ikusle gehiago izan da, gainera, gaurkoan. Gauzak horrela, Hazparneko taldea nagusitu da gaurkoan, 7-9ko emaitzarekin.