Duela hiru urte ekin zioten, herritarren ekimenez, Santio jaietan euskal kantak kantatzeari. Harrezkero, haur, gazte eta ez hain gazte bildu izan da herriko kaleak kantuz alaitzeko.
11:30ean zuten hitzordua, Olaederra kiroldegiaren aurrean. Aurten abestien letrak jarraitzeko bi telebista eta guzti. Eta nola ez, musikari ugariren eta Villabonako eta Zizurkilgo erraldoi eta ipotxen konpartsen konpainia ederrarekin.
Badu xarma kantujira honek. Baina aurten izan du beste berezitasun bat. Izan ere, kantu propioa falta zutela-eta, Drindots taldearen kantu bat musikatu eta bere egin dute Santiotan Kantari ekimenekoek. Oihana Iguaran bertsolariak jarri dizkio letrak, eta gaur abestu dute estreinakoz:
Ez aje ta ez logale
doinu ederren maitale
kantua beti izan delako
pozen eroale
Kantari zein kantuzale
elkarrekin kalez kale
desberdinetik bat egiteko
gai garen seinale (Bis)
Izan arren tonu motza
meritua da bikoitza
gure_eztarritan jarri ezkero
bakoitzak bihotza
altxatu lasai kokotza
eta alboratu lotsa
denok daukagu eta atera
dezagun ahotsa (Bis)
Herrigintzaren balantzan
hemen ez gaude zalantzan
gure hizkuntzak ta doinu zaharrek
irauteko plazan
biharkoen esperantzan
ta euskararen norantzan
jarri ditzagun oinak kantuan
ta ahotsak dantzan (Bis)
Herritik ta herriari
egin nahi diogu argi
bakarrik baino hobe delako
elkarrekin ari
ahots urratuen gaindi
Santioetan kantari
une txikiek egiten dute
herri hau hain handi (Bis)