Maite Izagirrek alkateak, udaleko aholkulari juridikoekin hausnarketa prozesu bat eraman ostean, Villabonako Udalak herri akusazio modura aurkeztea erabaki du. Pauso hau, orain dela aste batzuk Leonen gertaturiko istripu larrian hil ziren Jose Carlos Carrasco eta Nerea Agirreren kasuan emango da. Istripua, euren semea den Oratsekin batera Donejakueko bidea bizikletaz egiten zirenean gertatu zen.
Udalaren defentsa esperientzia handiko Ignacio Javier Fernandez Vega 63 urteko Leongo zigor legeetan aditu den abokatuak eramango du. Kasua Leongo Sahagun herrian kokatua dagoen epaitegian jarraituko da. “Komenigarriena ospe ona duen eta bertakoa den abokatu batekin lan egitea dela pentsatu dugu, kasuaren nondik norakoak lehen pertsonan ezagutu eta suertatzen diren egoerei azkartasunez erantzuteko” azaldu du alkateak. “Jose Carlos eta Nerearen zoritxarreko heriotzaren ezaugarriak ikusirik eta gizartean eragin duen hunkipena medio, justizia egiteko beharra sentitzen dugu, gidatzerakoan pertsona bakoitzak duen erantzukizuna kontuan edukiz, akusazio popular modura pertsonatzea gure beharra zela iruditu zaigu” gehitu du Izagirrek.