[GUTUNA] Bederatzi urte

Bederatzi urte igaro dira, baina zauria ez zaigu itxi oraindik. Ezin dugu eta ez dugu ahaztu nahi 2009ko uztailaren 31n gertatu zena.

Egun hartan, Remi Ayestaran Amasa-Villabonako herri ordezkari bezala ari zen lanean, Ertzaintzaren probokazioei muzin egin eta festak bakean bukatu zitezen ahaleginean. Baina ez zioten utzi, bihotza leherrarazi zioten.

Oraindik inork ez du azalpenik eman ezta ardurarik bere gain hartu ere. Bada garaia Remiri zor zaion aitortza egiteko!

Egia, justizia, errekonozimendua eta erreparazioa exijitzen jarraitu beharra daukagu.

Ez diegu uko egingo gure aldarrikapenei, bidezkoak direla sinesten baitugu.

Bide horretan, urte hauetan guztietan herritar asko eta askoren babesa sentitu dugu eta aurten ere hala izatea nahiko genuke. Horregatik, uztailaren 31n, 20:00etan, Remiren izena daraman ibilbidean espero zaituztegu.

Bide batez, lerro hauek baliatu nahi ditugu, urtero omenaldian musu truk parte hartzen duten dantzari, bertsolari, musikari eta gainerako lagunei eskerrak emateko.