Onddo Gazte Asanbladak egitaraua prestatu du Santio jaietarako. Datorren asteartean hasiko dituzte ekitaldiak eta bi gune izango dituzte: Onddo plaza bezala izendatu duten gunea kultur etxearen atzealdean eta Gaztetxea bera.
Aurtengoan ez dute festa batzordean parte hartu eta horregatik erabaki dute egitarau propioa osatzea: «Jai batzordeari azaldu genion moduan gaur egungo udal gobernuak aurreko urteko festetan izan zuen jarrera autoritario, koldar eta lotsagabea dela eta erabaki dugu batzordean parte ez hartzea». «Onddo Gazte Asanbladaren ekitaldiaren zentsura, Santio jai egitarauaren azalaren inguruko tirabirak, Remiren omenezko ekitaldia programatik kanpo uztea, presoen aldeko ekitaldiak programan jarri ez izana, gazteek antolatutako futbito txapelketarako diru laguntza murriztu izana eta herriko eragileek urtero atera ohi duten zapiari boikota egitea» dira aipatu zituzten arrazoiak.
Udalari zuzenduta esan zuten festak ez dituztela «apolitiko» bezala ulertzen, «gure ekintzek oinarri politiko bat baitute». «Festetan inoiz baino ozenago gure aldarriak plazaratuko ditugu. Ezin ditugu ahaztu gurekin ez daudenak eta besarkadarik beroena bidaltzen diegu bahituta eta espetxeratutarik dauden preso billabonatarrei. Herriko festak ere zuekin ospatu nahi baititugu», gaineratu zuten. Bukatzeko esan zuten aurten Gaztetxeari egokitu zaiola jaietako zapia «plazaratzea» eta prentsaren aurrean erakutsi zuten.
ONDDO EGITARAUA
UZTAILAK 24, ASTEARTEA
17:30. Kedada Eonian elektrotxarangarekin.
18:15. Txupinazoa eta Onndo plazaren inaugurazioa.
23:00. Danborrada Patxaranga txarangak alaiturik.
01:00. Kontzertuak: TPR eta Koltxoi!
UZTAILAK 26, OSTEGUNA
11:00. Erreka jaitsiera hasteko Gaztetxean elkartuko dira. Aranerrekatik kiroldegiko zubira bitarteko bidea egingo dute.
14:30. Gazte barrikotea Onddo plazan. Mozorroa: marrazki bizidunak. Ondoren, Orkresta elektrotxaranga.
Gauean zehar Little Martin Selektah.
UZTAILAK 28, LARUNBATA
00:00. Kontzertua: Txakur Jana.
UZTAILAK 29, IGANDEA
17:30. Haurrentzat jolasak Onddo plazan.
19:00. Kontzertu akustikoa: Lur Gaztelumendi.
UZTAILAK 30, ASTELEHENA
00:00. Kontzertua: Estarlus. Ondoren, Lilith & Dabu Selektah djak jarriko du musika.
UZTAILAK 31, ASTEARTEA
22:30. Karaokea Gaztetxean.